TIRANË- Banorët e Bërxullës kanë vijuar edhe këtë të dielë me protestën kundër projektit të rrugës Thumanë-Kashar. Ndërkohë disa prej tyre janë ulur në rrugë, dhe nuk pranojnë të ngrihen në rast se përfaqësues të qeverisë nuk shkojnë për të negociuar me ta. Policia ka tentuar t’i bindë që të ngrihen por ata nuk janë dakordësuar.
Banorët thonë se do të vetëflijohen në rast se qeveria nuk tërhiqet nga projekti i kësaj rruge.
“Kërkesat tona janë legjitime. Nuk do të tërhiqemi. Jetën e japim por pronën nuk e japim, kam duru shumë, nuk duroj dot më. Ku është shteti këtu. Nuk e hap rrugën. Do cohem kur të vij Tonin Vocaj, e kam marrë ne telefon, kur të vij ai do çohem. Mirë që më shkatërron tokën dhe shpinë, më thot mos dil ku.” u shpreh një nga banoret
Ndërsa një tjetër banorë ka deklaruar se shteti nuk do t’ia dijë për ta, dhe se kanë prej muajsh që protestojnë.
“Për banorët nuk po pyet as shteti as njeri. Kjo firma ka qenë e PD-së, tani është kthyer me PS-në. Ky shtet nuk do t’ia dijë për banorët. Vetëm mbledh firmat për të marrë paratë e veta. ne po shkojmë 5 muaj këtu. Nuk do presim edhe shumë, policia na pret te rruga por edhe ne do e mbrojmë të drejtën tonë. Nuk mund të bëjmë gjyq për shtëpitë tona që kemi punuar gjithë jetën. Nuk mund të ikim me një firmë. Unë kam 7 dynym tokë. Këtu bëhet autostrada dhe ne nuk e aksesojmë dot. Unë shtëpinë time do e mbroj deri në minutën e fundit. shtëpinë time nuk e lëshoj, do bëhem hero këtu. Shteti shqiptar është vetëm për të vjedhur, nuk e mbron popullin. Ka vetëm padrejtësi, prokurori jo, shtet jo.
Problemi ka shkuar në Parlament por bëjnë një sy qorr. Dikur i binte PS-ja bilbilit, sot i bie PD. Të njëjtën gjë kanë bërë dhe ata. Ata vetëm tallen me popullin. Këta i bien bilbilit, ata miratojnë ligje. Ligjet nuk zbatohen për popullin, i bëjnë ligjet që kur të vijnë në opozitë t’i kenë për vete prapë. Ne do reagojmë në mënyrat më të këqija, do vijnë ata të më vrasin, do i vras dhe unë, me gurë me sfurk, armë nuk kam përdorur dhe nuk përdor. Le të vijë firma të sqarohet me popullin”, tha një nga banoret
Ndërsa një tjetër banore pohoi se deri më tani nuk ka shkuar askush për t’i, edhe pse ndonëse projekti ka parregullsi.
“Kemi 4 muaj që protestojmë dhe nuk kemi asnjë reagim nga instancat shtetërore, duke nisur nga ministria e Infrastrukturës. As nga kryeministri s’kemi asnjë reagim, apo nga IKMT. IKMT duhet të vinte në terren dhe të shoh këtë paligjshmëri. Ne duam që prona të vlerësohet sipas çmimit të tregut. Po ashtu duhet të shihet dhe linja e Interkonjeksionit, pasi edhe plani për lëvizjen e kësaj linje, ia kanë lënë firmës Gener 2. Fakti që bëhemi rrugë dytësore, stopohet jeta. Këtu banorët mbahen me bujqësi dhe blegtori. Kjo i sjell të ardhura atyre.” u shpreh banorja.
Në shenjë revolte, gratë protestuese u ulën në tokë, duke mos u ngritur pa mbërritur uniformat blu.
