Majtas apo djathtas? Meta tregon pozicionin e Partisë së Lirisë, flet mbi bashkëpunimin me Berishën
Kryetari i Komitetit Organizativ të Partisë së Lirisë, Ilir Meta sqaroi për gazetarët pozicionin ideologjik të forcës së tij politike.
Meta tha se liria, sovraniteti dhe kushtetueshmëria, nuk janë as të majta as të djathta.
Po ashtu ai theksoi se nuk bëhet fjalë për një parti nacionaliste, por një parti patriotike dhe ultra demokratike.
Për sa kohë unë të jem lider i saj, për asnjë sekondë nuk do bojkotojë gjë në këtë vend. Qeveria do iki me zgjedhje dhe me protesta. Partia e Lirisë është e vendosur që të marrë pjesë në të gjitha zgjedhjet dhe është e bindur në një triumf të madh të opozitës. Liria është e majtë apo e djathtë, sovraniteti është i majtë apo i djathtë, kushtetuta është e majtë apo e djathtë, është gjithëpërfshirëse. Jemi në një moment ku nuk kemi të bëjmë me të majtë dhe të djathtë. PS është parti e majtë?! PS është vërtet parti patriotike sot?! Partia e Lirisë është parti patriotike, kjo është detyrë e çdo shqiptari. Partia e Lirisë do ndezë flakën e shpresës. Kjo flakë do ta shpëtojë Shqipërinë nga kjo rrokullisje e pamëshirshme, ku e ka futur kjo bandë që ka uzurpuar PS-në. Nuk është parti nacionaliste. Nuk kemi pretendime territoriale kundrejt asnjë vendi. Nuk jemi parti nacionaliste. Jemi parti ultra demokratike. Referendumi është garanti i rikthimit të Shqipërisë në themelet e Kushtetutës më të mirë që ka parë kjo tokë. Ishte ajo e vitit 1998”.
I pyetur në lidhje me bashkëpunimin me Sali Berishën dhe nëse synon që Partinë e Lirisë ta bëjë forcë të parë opozitare, Meta tha:
S’është ky problemi ynë, kush do jetë parti e parë e opozitës. Nëse je parti e parë e opozitës për një kohë të gjatë, je bisht i mazhorancës. Nëse do ketë një konkurrencë, do jetë ndaj korrupsionit dhe kapjes së shtetit”.
