Meta sulmon Bashën: Mashtrues ordiner! Djegia e mandateve, plan i mafies dhe oligarkëve!
Nga fjala e tij në Konventën e LSI, Ilir Meta sulmoi ish-kryetarin e Partisë Demokratike, Lulzim Basha.
Meta e quajti Bashën mashtrues ordiner, ndërsa shtoi se djegia e mandateve dhe bojkotimi i pushtetit vendor ishte një plan mafioz i oligarkëve.
“Edhe ju ishit target në 5 vitet e kaluara. I bëj të qartë çdo anëtari e simpatizanti të LSI-së dhe çdo qytetari kudo është se Ilir Meta ka qenë kategorikisht kundër bastit të çmendur për t’i besuar një mashtruesi ordiner, që e kam thënë prej 6 vjetësh që të gënjen edhe për orën, duke djegur mandatet, duke lënë Parlamentin, duke bojkotuar pushtetin vendor. Padyshim jemi vend europian. Por më thoni a ka një vend afrikan nga ata më të pazhvilluarit që në pushtetin lokal nuk ka një këshilltar të opozitës? A ka? Më thoni? Djegia e mandateve ishte e mirëplanifikuar nga mafia që drejton Shqipërinë, nga oligarkët që punojnë në të dy palët tërë kohës. Sepse duhej të braktisej pushteti lokal që të bëhej Tirana siç është bërë, që të ndodhnin këto ngjarje që kanë ndodhur me trashëgiminë tonë më të rëndësishme, kulturore, arkeologjike, jo vetëm për arsye korrupsioni, por për të zhbërë identitetin kulturor, kombëtar”, tha Meta.
