TIRANË– Vendimi i Komisionit Qëndror të Zgjedhjeve për të lënë jashtë zgjedhjeve vendore të 14 majit Partinë Demokratike ka sjellë reagime të shumta. Në një postim në rrjetet sociale deputeti Gazment Bardhi akuzon Kryekomisionerin Ilirjan Celibashi se shkeli rëndë ligjin për qëllime politike. Bardhi bën me dije se ky vendim do të ankimohet në Komisionin e Ankesave dhe Sanksioneve.
POSTIMI I GAZMENT BARDHIT:
Asnjë njëri i shantazhueshëm dhe që nuk respekton ligjin, nuk meriton asnjë respekt. Ilirjan Celibashi ka humbur besimin e PD për të administruar procesin zgjedhor. Ai shkeli rëndë ligjin, për qëllime politike. Vendimi do të ankimohet menjëherë në KAS.
Asnjë njëri i shantazhueshëm dhe që nuk respekton ligjin, nuk meriton asnjë respekt. Ilirjan Celibashi ka humbur besimin e PD për të administruar procesin zgjedhor. Ai shkeli rëndë ligjin, për qëllime politike. Vendimi do të ankimohet menjëherë në KAS.
— Gazment Bardhi (@GazmentBardhi) March 14, 2023
Po ashtu dhe deputeti tjetër demokrat Enkelejd Alibeaj ka reaguar ashpër pas këtij vendimi. Në një postim në rrjetet sociale Alibeaj shkruan se vendimi i Celibashit për të lënë jashtë zgjedhjeve Partinë Demokratike është qartazi një vendim politik duke akuzuar Kryekomisionerin Ilirjan Celibashin se bëri një shërbim politik ndaj kundërshtarëve të Partisë Demokratike.
POSTIMI I ENKELEJD ALIBEAJT:
Vendimi i paralajmëruar i Komisionerit të Zgjedhjeve është qartas i ndikuar politikisht nga aktorët politikë të interesuar që PD të mos regjistrohet në procesin e zgjedhjeve vendore të 14 majit. Sikundër e deklaroi dhe publikisht, zoti Celibashi e ka të pamundur të ndajë opinionet dhe tifozerinë personale nga faktet juridike. Për pasojë, vendimi i tij e zgjat pa fund dhe pa arsye të qenësishme regjistrimin e PD. Dukshëm, e madje deri në kufijtë e groteskut, komisioneri nisur vetëm për shërbim politik ndaj kundërshtarëve të PD, vendos ta përjashtojë nga zgjedhjet. Siç ndodhte këtu e 32 vjet më parë, kur ishte partia në pushtet ajo që lejonte ne zgjedhje vetëm satelitët e saj. Kjo marrëzi politike, si 32 vjet më parë, i ndodh sot Shqipërisë kur është vend i NATO-s dhe synon të jetë anëtar i BE-së! Megjithëkëtë e si përherë do të vijojmë rrugën ligjore për të finalizuar përfaqësimin e PD në 14 maj. Çdo artificë ligjore apo arsye e stisur politike dhe aspak ligjore është thjesht rruga e dëshpëruar që zgjatime të politikës së vjetër në institucione kushtetuese të pavarura kanë zgjedhur për të na penguar në rrugën tonë. Nuk do ia dalin!!
