TIRANË– Kreu i grupit të Partisë Socialiste Taulant Balla i është përgjigjur akuzave të kreydemokratit Sali Berisha në lidhje me projektligjin e qeverisë që detyron mjekët e rinj që 5 vite pas shkollës të punojnë në sistemin shëndetësor shqiptar. Balla akuzoi Berishën si gënjeshtar teksa shtoi se flet akoma si mjeku i Enver Hoxhës. I ndalur tek projektligji Balla tha se vendi ynë duhet të prodhojë mjekë për Shqipërinë dhe jo për Gjermaninë. Po ashtu ai tha se vendi ynë nuk i ka kapacitetet që të paguajë mjekët siç paguhen kolegët e tyre gjermanë.
Taulant Balla: Mjeku varkëtar i Enver Hoxhës dhe familjes së tij, i ngelur jetim që nuk i shkon mbrapa më askush dhe sic e thashë në mëngjes, ju jeni të gatshëm të tërhiqni ose të gënjeni këdo, mjafton të bëhen 10-15 veta për një protestë. Gënjeu pa pikë turpi si e ka zakon për pagat. Një mjek specialist në Gjermani paguhet 146 mijë euro në vit. Këtë nuk e arrijmë dot. Interesi kombëtar publik është shëndeti dhe kujdesja për qytetarin e cdo vendi. Na duhet të garantojmë qoftë banorëve të Vicidolit e Konspolit, shëndet publik. Prandaj duhet mjeku e infermieri. Zotëria thotë do dal në protestë sepse dua që me paratë e taksapaguesve të prodhojmë mjekë për Gjermaninë. Ne themi duhet të prodhojmë mjekë për Shqipërinë dhe të garantojmë interesin publik. Ne do e bëjmë. Ky projektligj do kthehet në ligj në datën 20 korrik. Është rasti më i mirë që të mos bini pre e një keqinformimi, një budallallëku që t’i shkoni nga mbrapa disa zërave që thonë po shkelet. Nuk po shkelet Kushtetuta.
