Gazetarja Ola Xama rrëfeu në “Stay Tuned” me gazetaren Valbona Mhilli sfidën e saj të re në televizion si autore e emisionit investigativ “Kronos”. Xama tha se publiku është mësuar me “formate të egra” debati, por ajo beson se media duhet të jetë në radhë të parë informuese dhe edukuese dhe në fund argëtuese. Xama vë në dukje se sot media shqiptare fokusohet shumë drejt klikimeve dhe ngjarjeve të bujshme, por pa përmbajtje.
Është një emision i ri, edhe për mua është një sfidë. Pas 13 vitesh gazetari terreni, nuk doja të lija terrenin, por doja që të mos kisha vetëm raportim, por edhe thellim dhe hulumtim. Është një sfidë sepse opinioni publik është mësuar me formate të egra, ku ti dëgjon diçka dhe nuk e kupton se çfarë ka sepse ka më shumë debate se sa të informohesh për lajmin. Patjetër që ajo mund të jetë argëtuese. Media duhet të jetë në radhë të parë informuese, edukuese dhe në fund fare argëtuese. Sot media shqiptare është e fokusuar më shumë drejt klikimeve, ngjarjeve që bëjnë bujë, por s’kanë asnjë lloj thelbi, asnjë lloj përmbajtjeje, asnjë lloj kontenti që mund të edukojë opinionin publik, brezin e ri, prandaj e konsideroj një projekt sfidues. Është edhe informues, pasi nëse do që të marrësh informacion mbi një çështje duhet të marrësh që në fillim zanafillën e dosierit, se si ka qenë ngjarja dhe si është tani, dhe të nxitësh edhe mendimin kritik te opinioni publik”.
Xama tregon përse gazetaria investigative është një zhanër i vështirë dhe sfidat me audiencën. Ajo shprehet se:
Nëse ka një zhanër që është i vështirë, ai është zhaneri i gazetarisë investigative. Merr kosto, kosto personale, kosto profesionale, sepse në momentin që atakon një institucion, një zyrtar, nesër pasnesër s’e ke derën të hapur te ai institucion, qoftë edhe për të marrë informacione zyrtare që të takojnë. Pasi ndërkohë që ke mbrapa atë nofkën investigativ, gjithmonë druhen që ta japin. Është një punë me burime, që edhe pse do kohë, ndonjëherë s’e ke kohën e mjaftueshme. Është një sfidë edhe sa i takon audiencës. Sepse jo të gjithë janë në kërkim të lajmeve investigative, janë në kërkim të show-t, një emisioni që ka ritëm. Jemi te sfida si ta bëjmë atraktiv, si të tërheqim më shumë opinionin publik”.
Ndër të tjera gazetarja thotë se zgjodhi televizionin MCN sepse e konsideron si një prej mediave me lirinë më të madhe në Shqipëri, ku deri më tani nuk është përballur me censurë në asnjë temë të hulumtuar.
Zgjodha MCN televizion sepse për mua është një nga mediat që ka lirinë më të madhe sot në Shqipëri. Kam punuar edhe në media të tjera, patjetër që niveli i censurës, qoftë nga marketingu, institucionet, presionet e qeverisë është shumë i madh. Kur bën një emision invetigativ pyetja e parë është: A do të më lënë që të botoj një temë? Sepse prek interesa shumë më të mëdha. Deri tani mua s’më është thënë asnjëherë që kjo temë nuk bëhet, kemi klientë marketingu. Gjithmonë më është thënë a e kemi të dokumentuar temën, që mos kemi risqe ligjore që nesër pasnesër mund të ankimohet në gjykatë, apo lajmi të jetë i pasaktë. Vetëm standarde të cilësisë. Kam patur ftesa edhe nga televizione të tjera, por zgjodha televizionin MCN për këtë”.
E pyetur se si përzgjidhen ngjarjet dhe temat e trajtuara në emision Xama thotë:
Rankimi i temave bëhet në mënyrë të tillë, ne kemi gjithmonë kemi dy tre tema që ne si gazetarë i identifikojmë dhe mendojmë që ka brum për t’i zhvilluar dhe që ka ndodhur diçka në prapaskena. Janë ato elementët, siç i bën rankimin Policia, Prokuroria, apo grupet audituese, që janë elementët e riskut. Ku ka kontrata sekrete, nëse s’është publikuar i bie ka diçka. Kur dëgjon edhe sinjale nga tregu që një tender është dhënë në mënyrë sekrete, kompanisë me ofertën më të lartë, atëherë merremi me atë gjë. Një emision investigativ është gjithmonë me misionin për të parë se çfarë ka ndodhur në prapaskenë diçka e keqe dhe jo për të zbuluar të mirën. Kjo është natyra e fjalës investigim”.
